Жаңалық - Қазақстан жаңалықтары

новость от 22.08.2025

АСТАНА. KAZINFORM — Су жабдықтау және су төгімді жүйелеріндегі су есептеу құрылғыларын таңдау, орнату және пайдалану жөніндегі жаңа ережелерді өнеркәсіп және құрылыс министрі өзінің бұйрығымен бекітті.

Құжат есептегіштерді орнату және пайдалану тәртібін, олардың метрологиялық тексерісіне және ауыстыруына қойылатын талаптарды, сондай-ақ су алу және су төгетін құрылыстардағы, насос станцияларындағы және соңғы тұтынушылардағы су есептеу тораптарының минималды жабдықталу деңгейін анықтайды.

Ережелерге «автоматтандыру», «ақпараттандыру объектілері», «қашықтан деректер жинау және беру» және «деректер жинау және беру құрылғысы (ДСБҚ)» сияқты терминдер енгізілді.

Су есептеу тораптары су жабдықтау жүйелерінің әрбір кірісінде – тұрғын және тұрмыстық емес ғимараттарда орнатылуы тиіс. Көппәтерлі үйлерде жалпы тұрғын үйдің су есептегіші енгізіліп, жалпы тұтыну көлемі тіркеледі.

Тексеру және ауыстыру:

• Есептегіштер мемлекеттік өлшеу құралдары реестріне енгізіліп, тексеру мөрі мен сертификаты болуы тиіс.

• Межтексеру аралығы аяқталған соң құрал коммерциялық есептен алынып, есептеулерде қолданылмайды.

• Құрал істен шыққан жағдайда қызмет көлемі үш алдыңғы айдың орташа тұтынуы бойынша уақытша анықталады, бірақ бір айдан аспайды. Құралды ауыстыру 30 күн ішінде жүргізілуі қажет.

Мөрі бұзылған, тексеру мерзімі өткен немесе реестрде тіркелмеген есептегіштерді пайдалануға тыйым салынады. Ақаулар немесе ұрлық анықталған жағдайда жауапкершілік су тұтынушыға жүктеледі.

Есептеу құралдарын пайдалану және сақтауға жауапты тұлғалар:

• Құрылысшы – нысанды меншікке тапсыруға дейін;

• Заңды тұлға немесе тұрғын үй иесі – нысан пайдалануға берілгеннен кейін;

• Көппәтерлі үйлерде – кондоминиум басқару органы немесе оның болмауында тұрғындар.

Бұған дейін елімізде су тарифін есептеу жүйесін толық цифрландыру жоспарланып отырғанын жазған едік.